林峯、容祖兒、蔡卓妍（阿Sa）與王祖藍在電影《翡翠明珠》大鬧四角戀，訪問當日，祖藍有工作在身未能出席。祖兒說及與林峯的咀戲，卻沒忘記祖藍，坦言最想跟祖藍接吻；阿Sa亦棄選林峯，坦言最好咀的始終是劉德華。 撰文、攝影：沈培芳
祖兒所飾演的女山賊，一早被山寨王捉去做老婆，未試過何謂浪漫愛情，後來山寨王過世，她當起寨主照顧一班山賊，而她在戲中會「生擒」林峯。當見到林峯與阿 Sa，她原本只想打劫，卻意外踢了阿Sa落山，給她看到林峯對阿Sa情深的一面，十分感動；林峯之後又幫她的手下，再給她英雄感覺，令她動情。至於阿Sa 跌落山後失憶，變了平民，並跟祖藍一起，引發起四角戀情。
林峯與阿Sa原是一對，兩人有一場激咀戲。祖兒爆料說：「我聽到啲嘢，嗰日吳雨大哥特登嚟探班，嫌佢哋咀得唔夠激，要重拍。」林峯承認：「係有重拍，第一次喺香港拍，因為唔到肉，要幅度大哋。」祖兒質疑：「係唔係要Get Wet？」林峯澄清：「冇！」這時阿Sa才表態：「戲裏面只有一場激咀戲。」被笑指戲外又有多少場？林峯解畫：「戲外拍咗兩次。」
阿Sa指華仔最好咀
阿 Sa表示這場咀戲不難拍，兼且感覺不俗。問及林峯好咀否？阿Sa提高聲調笑說：「好到極，從未試過咁好。」阿Sa曾表示跟劉德華（華仔）拍咀戲最難忘，被翻舊帳的她笑謂：「同劉德華當然讚佢最好，拍呢部係梗係讚林峯啦！」阿Sa被迫供時問及，所有合作過的對手當中誰最好咀？她只好坦言說：「都係華仔！」阿 Sa隨即跟林峯說不好意思，祖兒亦搭口說：「個個都想同華仔，林峯都係。」
至於祖兒與林峯的接吻戲，祖兒笑謂多講無謂，因為接觸面很少，完全感覺不到。林峯說：「同祖兒咀咗一嘢，面前Set定咗個半圓形軌（給攝影機來回拍攝），我哋好似定咗格咁嘴對嘴，淨係聽到叫我哋Keep住、繼續。」祖兒表示嘴不能合攏，又不可以吞口水，定格足足數分鐘，最擔心是拍到滴口水。祖兒又忽發奇想說：「反而我覺得祖藍會幾好咀，因為佢個嘴夠厚。（但你要遷就佢個高度？）抱起佢咀囉！」
有機會提名金像獎
談及票房，祖兒擔心不及《反斗奇兵3》好，林峯則謂有信心，阿Sa提醒影片有內地票房撐夠。對於吳雨稱讚他們今次的表現，有機會提名香港電影金像獎與台灣金馬獎。祖兒搶先說：「冇所謂，我喺呢方面冇壓力，因為我喺電影從來都係零，希望令我重新認識電影，自從《神經俠侶》後，我有6年冇拍戲，對我嚟講（攞獎）好輕鬆，雖然拍嗰陣好驚，驚連累劇組，好彩拍完都OK。」阿Sa則說：「有（提名）就賺，最重要部戲拍得幾開心，之前都未試過同祖兒合作拍戲。」祖兒回敬阿Sa說：「好彩影后（指阿Sa）有教路。」阿Sa隨即補充跟林峯及祖藍也是首次合作。
林峯自言最想提名最佳新演員，即被踢爆當年曾與李彩華合演《別戀》，早失去參選新演員資格。他只好尷尬說：「都相隔咗10年，今次又係我第一次拍喜劇，就算拍戲我都未試過拍喜劇。除咗幾位主角，我要好多謝戲裏面其他演員，林雪、萬子（萬梓良）、劉以達等，出嚟有好多化學作用，好多爆肚嘢，好好笑。」
没有评论:
发表评论