[頭條娛樂] 16/4/2010 賣碟王身嬌肉貴 林峯唔濕得

演而優則唱的林峯好厲害，年頭攞完十大勁歌金曲「亞太區最受歡迎香港男歌星」後，再拎埋「全年最高銷量本地男歌手」大獎，升格為賣碟王的他，身價當然今非昔比。日前晚上，林峯同歐陽震華 及楊怡 在銅鑼灣為新劇《不速之約》拍外景，話晒亞太區最受歡迎男歌星，所以林峯一現身，街坊即時空群而出爭睹林峯的風采，可惜天公不作美，一場微雨令林峯異常狼狽，所以當事人黑面實屬正常。採訪︰張詠森


　　去年在紅館開完演唱會後，林峯先後奪得兩個音樂大獎，為獎勵自己，日前更豪花2,058萬，買入西營盤豪宅縉城峰高層單位，一嘗做業主滋味。

　　貪靚忌雨

　　日前晚上，林準業主在銅鑼灣白沙道拍外景，逗留不到10分鐘，即惹來無數街坊聚集，「真係靚仔喎。」之聲此起彼落，o氹得林峯陰陰嘴笑。不過，快樂的時光過得特別快，突然間落起毛毛雨，街坊開遮睇拍劇，可憐林峯要繼續做戲，雨點雖細，但密度足以令其髮型來一個乾坤大挪移，心知不妙的他即時叫停，然後對着鏡左整右整，可惜點整都睇唔順眼，焦急的他唯有不斷催促劇組快啲拍完，然後監製一聲「Cut」，林峯即以光速奔回外景車。